पिंपळे निलख :- पिंपरी चिंचवड शहरातील विशाल नगर येथे १६ नोव्हेंबर रोजी रहिवाशांची बैठक पार पडली. या बैठकीत लोकाना भेडसावणाऱ्या दैनंदिन नागरी प्रश्न , आणि सुरक्षाविषयक अडचणी यांसारख्या तातडीच्या नागरी समस्यांचे संकलन करून ‘रहिवासी घोषणापत्र’ तयार करण्याचे ठरले. हे घोषणापत्र आगामी महापालिका निवडणुकीतील सर्व उमेदवारांना देण्यात येणार असून, निवडून आल्यावर त्यांनी कोणत्या प्राधान्यक्रमाने काम करावे याबाबत स्पष्टता मिळवणे हा यामागील उद्देश असल्याचे सांगण्यात आले.

तसेच नगरसेवकांच्या अधिकाराबाहेरील तक्रारी आमदार आणि खासदार पातळीवर मांडल्या जाणार आहेत, अशीही माहिती देण्यात आली. त्याचप्रमाणे होणाऱ्या कामांचा दर्जा सुनिश्चित करणे ही देखील नगरसेवकांची जबाबदारी व कर्तव्य असल्याचे मत सर्वांनी व्यक्त केले कारण नागरिकांचा पैसा महापालिकेमार्फत योग्य मार्गाने आणि कुठलाही अपव्यय न होता खर्च व्हावा, अशी अपेक्षा व्यक्त करण्यात आली.

या उपक्रमाबाबत रहिवाशांनी स्पष्ट केले की हा गैर-राजकीय, रहिवासी-केंद्रित मंच असून, तो फक्त निवडणुकांच्या काळातच नव्हे, तर संपूर्ण वर्षभर सातत्याने विविध विषयावर काम करणार आहे, आम्ही कोणत्याही पक्षाच्या समर्थनासाठी किंवा विरोधासाठी येथे नाही. तसेच निवडणुकांमध्ये “मतदानाचे कर्तव्य सोडून” कोणत्याही प्रकारे सहभागी होणार नसल्याचेही रहिवाशांनी स्पष्ट केले. मात्र निवडणुकीत उभे राहणाऱ्या सर्व उमेदवारांनी रहिवाशांच्या अपेक्षा आणि समस्या समजून घेणे अनिवार्य असल्याचे मत व्यक्त करण्यात आले.

दरम्यान, या बैठकीस सांगवी पोलीस ठाण्याचे महिला मार्शल पथक उपस्थित होते. त्यांनी सांगितले की परिसरात २४ तास पेट्रोलिंगसाठी स्वतंत्र जीप व महिला पथक नियुक्त केले आहे. परिसरात संशयास्पद हालचाल दिसताच विलंब न करता सांगवी पोलिस नियंत्रण कक्षास कळवावे.