थरमॅक्स चौक परिसरात घराला आग नियंत्रणात

पिंपरी:- पिंपरी चिंचवड शहरातील थर्मॅक्स चौक येथील एमएसईबी कार्यालयाजवळील एका घराला मंगळवारी (३१ मार्च) रात्री सुमारे साडे नऊच्या सुमारास अचानक आग लागल्याची घटना घडली. घटनेची माहिती मिळताच पिंपरी चिंचवड महापालिकेच्या अग्निशमन विभागाचे प्राधिकरण उप अग्निशमन केंद्र व चिखली उप अग्निशमन केंद्र येथील पथकांनी तात्काळ घटनास्थळी दाखल होत नियोजनबद्ध पद्धतीने आगीवर नियंत्रण मिळवून ती पूर्णपणे विझवल्यामुळे मोठी दुर्घटना टळली.

आगीमुळे परिसरात मोठ्या प्रमाणात धुराचे लोट दिसत होते. अग्निशमन दलाने तात्काळ आगीवर नियंत्रण मिळवल्यामुळे ही आग आजूबाजूला असणाऱ्या घरांमध्ये पसरण्यापासून रोखण्यात यश आले आणि संभाव्य मोठी दुर्घटना टळली. सुदैवाने या घटनेत कोणतीही जीवितहानी झाली नाही. घटनेमध्ये घरातील संगणक, दूरदर्शन संच, कपडे, पंखे, इलेक्ट्रिक वायरिंग तसेच फायबर साहित्य जळून मोठे आर्थिक नुकसान झाले आहे. अग्निशमन अधिकारी गौतम इंगवले यांच्या नेतृत्वाखाली जवानांनी ही मोहीम पूर्ण केली.

तरी नागरिकांनी विजेची उपकरणे सुरक्षितपणे वापरणे तसेच कोणतीही आपत्कालीन घटना घडल्यास त्वरित अग्निशमन विभागाच्या १०१ या आपत्कालीन क्रमांकावर संपर्क साधावा, असे आवाहन अग्निशमन विभागाच्या वतीने करण्यात आले आहे.